Davao City – Wala na makurat pa ang Volunteers Against Crime and Corruption (VACC) sa gihimong pagbulgar karon sa Philippine Drug Enforcement Agency (PDEA) nga adunay pipila ka pulis involved sa pag-recycle sa nakumpiskang mga illegal drugs.
Matud ni VACC President Boy Evangelista, sukad pa kaniadto, naga-recycle na og droga ang mga ‘ninja cops’ kun mga police scalawags ug rogue cops.
Sumala ni Evangelista, dili lamang panahon sa Duterte administration ang isyu sa recycling sa droga apan bisan pa sa nakalabay’ng administrasyon ni kanhi Pres. Benigno Aquino III.
Segun ni Evangelista, usa ka ilado ug kwartahan nga personalidad sa kaulohan ang customer sa mga ‘ninja cops’ ug maoy nagapalit sa recycled drugs sulod na sa upat ka tuig.
Apan nagdumili si Evangelista sa pagbutyag sa pangalan ug kung kini pulitiko ba o pribado nga tawo kay dili pa kini mao ang tukmang panahon aron masayod ang katawhan kung kinsa kini.
Kining tawhana mahilig manghatag og mahalon nga mga sakyanan, segun sa VACC official.
Usa kini sa mga dakung rason nganong padayon gihapon nga mikuyanap ang iligal nga droga taliwala sa madugo nga giyera kontra droga nga gikasa sa kasamtangang gobyerno batok sa mga drug syndicates, ilang mga kakonsabo kun kakontsaba sulod ug gawas mismo sa gobyerno.
Hinoon wala gihapon kawad-i og paglaum si Evangelista nga una pa man munaog sa gahum si Duterte, matuldukan na ug muabot na ang katapusang adlaw sa mga sindikato sa droga dinhi sa nasud.
RadyoMaN Joel Viray
