Kalibo, Aklan – Liwat na naman nga nagpangbiktima ang mga miyembro sang salisi gang matapos makawat ang wallet sang isa ka turista nga Koreano samtang galibot sa isa ka mall sa Barangay Balabag, Boracay.
Nakilala ang biktima nga si Eutteum Kim, 34-anyos, kag nagapuyo sa Barangay Manoc-Manoc, Boracay.
Nakuha sa biktima ang iya wallet nga may unod nga P17,000 nga cash kag mga importante nga dokumento.
Sa report sang Boracay Tourist Assistance Center, samtang nga nagalibot sa sulod sang shopping mall ang biktima, gintuparan ini sang duha ka lalaki kag tatlo ka babaye.
Nakibot na lang gid ang biktima sang mahibalu-an nga nadula na ang wallet sa sulod sang iya backpack.
Sa kuha naman sang CCTV sa nasambit nga establishment, nakit-an ang isa ka lalaki nga naka-pula nga T-shirt nga nagpalapit sa biktima kag gin-abrehan ang iya backpack kag ginkuha ang wallet sini.
Padayon pa ang imbestigasyon sang awtoridad sa insidente.
————————
Like our official Facebook page: www.facebook.com/ifmbacolod943
