Mas ginpabakod sa subong sang Koronadal City Police Station ang pagpatrolya paagi sa bulig sang Provincial Mobile Force bilang aksyon sa serye sang nagaluntad nga insidente sang pagpangluthang sa syudad.
May-angot sini, suno kay P/Supt. Joefil Siason, Chief of Police sang Koronadal CPS may motocop kag may kaupod nga nakacivilian ang nagalibot sa syudad nga ang target sang mga ini ang mga nakamotor ukon riding in tandem.
Samtang suno kay Siason , ginbakod man nila ang radio communication sa mga barangay agud nga kon may magluntad nga insidente gilayon nga makaflash alarm kag makarepondir sila kapareho sang natabo kahapon nga adlaw nga madasig nga nadakpan ang nakapalagyo nga suspek sa buy-bust operation nga si JayRick Frias Dorero.
Pahayag pa sang chief of police nga ginahulat pa nila ang dugang nga pwersa nga ginrequest sa PNP regional office, matapos nga kulang suno pa ang ila nga pwersa sa subong.
Ginkumpirmar man ni Siason nga sa lima ka insidente sang pagpangluthang sa syudad sang Koronadal halin Enero tubtob Marso isa pa lang ang may napasakaan sang kaso nga suspek.
Isa sa problema nila suno pa amo nga mabudlay nga kilalahon ang mga suspek bisan may CCTV footage pa tungod nakasuksok sang facemask.
Hingyo man ni COP Siason sa katawhan nga padayon ang paghatag sang suporta sa kapolisan para sa katawhayan.
