Nagapatigayon na sila sang monitoring kag pagpatrolya sa mga sementeryo dire sa syudad sang Koronadal kabahin sang implementasyon sang Executive Order no. 48 sang LGU subong nga Undas, suno kay PLtCol. Joedy Lito Gusinga, Chief of Police sang Koronadal CPS.
Ginpahayag ni PLtCol. Guisinga nga may deployment sang PNP personnel kaupod ang mga BPATS kag traffic enforcers sa mga sementeryo dire sa syudad agud nga masiguro nga wala sang makasulod umpisa sa Oktubre 29 tubtob Nobyembre 2 base sa EO 48, magluwas lamang kon may –yara sang nakaschedule nga lubong.
Nahibaluan nga sarado umpisa bwas nga adlaw tubtob Nobyembre 2 ang mga pampubliko kag pribado nga sementeryo kabahin sang preventive measures sang gobyerno batok COVID -19.
May-angot sini, nagaapela man si Gusinga sa publiko nga mangin security conscious nga kon may makita nga makaduluda nga tawo kag insidente ang gilayon nga magreport sa kapolisan.
