Gipusil patay ang usa ka biktima didto sa dalang provincial, brgy. Uno, Lungsod sa Katipunan, ning atong probinsya duol sa Meiko Commercial building.
Naila ang biktima nga si Paul Generoso Bayron alyas Poloy, usa ka koyme sa bulangan, 43 anyos, molupyo sa purok 1, brgy. Mias, sa maong lungsod.
Ang maong biktima nitahan usab kini sa iyang kaugalingon sa Oplan Tokhang, giila usab kini nga HVT level 3.
Sa nahimong imbistigasyon sa kapulisan nasayran samtang ang biktima nagsakay sa iyang motor nga Honda wave kolor itom, nagtangag sa plaka numero 4418 JW, padulong sa brgy. Mias, paghidangat sa brgy. Uno, gisundan kini sa duha ka wala mailang suspek nga naka jacket sakay sa motorsiklo, ang angkas niini milanit sa taas nga armas, nga gituohang M16 rifle, dayong pusil ngadto sa biktima sa makaduha ka higayon, naka angkon ug samad pinusilan ang biktima sa iyang ulo hinungdan sa wala damha niyang kamatayon.
Human sa panghitabo dali nga miikyas ang mga suspek sa habagatang direksyon.
Sa pagkakaron padayon pa ang gihimong makuting imbistigasyon sa kapulisan sa katipunan, kun unsay nagpaluyong motibo sa maong pagpamusil.
