Davao City- Subling gipamatud-an sa onse ka tribu sa siyudad sa Davao nga pabilin nabatonan ang panagkahiusa diha sa pagpreserba sa kultura ug praktis busa padayon kining buhi hangtud sa henerasyon karon.
Luyo sa kamoderno sa panahon,dili matago anaa gihapon ang kultura sa mga tribung Ata,Bagobo K’lata, Bagobo Tagabawa, Matigsalug, Obu Manuvu,Iranun, Tausug,Kagan,Sama, Maranao ug Maguindanaon.
Katuyuan sa Kadayawan Festival mao nga ipaila ug pasidunggan ang mga tribu sanglit gumikan kanila na-himugso ang Davao kung asa ang tanan nagpahimulos sa kadato sa dakbayan karon.
Sumala ni Iranun Tribe Deputy Mayor Pamiriken Latip Ayunandatu Arumpac Jr. nga utang kabubut-on nila kang Pangulong Rodrigo Duterte ang tanan nga maoy nagpasiugda sa atong kadayawan festival.
Gilab-as ni Deputy Mayor Arumpac ang kamahinungdanon sa Davao River kay dinhi manukad ang mga katigulangan aron magdala og abot sa uma sa merkado sa Bankerohan sakay sa gibugkos nga mga kawayan.
Matud niini, ang Davao River kabahin na sa kultura sa onse ka tribu ug kung unsa man ang dabaw karon kana tungod sa dakong kontribusyon sa sugbang sinugdanan kun fluvial parade.
Gipasalamatan sab ni Arumpac si Mayor Inday Sara Duterte-Carpio sa gigahin nga pundo niini mao nga engrande ang fluvial parade kagahapon adlawa.
Ang gikabiliban pa ni niini sa kinaiya sa mga Davaoeños mao ang pagminahalay ug respeto sa pagdawat sa lahi-lahi nga kultura ug tinuhuan ma-muslim, lumad, ug kristiyano.
Ug nahimo kining susi aron padayon masinatian ug matilawan ang kalinaw ug kalamboan sa siyudad nga angay ipasigarbo sanglit kita lamang adunay ingon niini nga pagsinabtay ug kinaiya sa tibuok nasud.
Gilunsad usab sa executive committee sa Kadayawan ang Kaondayawan kung asa dili lamang makakaon og lamian nga mga pagkaon ang mga Davaoeños apan lipayon ug lingawon usab sila sa nindot nga musika.
Ang Kaondayawan kabahin kini sa dagko nga mga event sa 32nd Kadawayan Festival 2017.
Kasamang Joel Viray
