General Santos City—Dako ang natabang sa kumunidad ngadto sa PDEA aron nga matoltolan ang mga lugar nga dunay plantasyon sa marijuana dinhi sa Rehiyon-12, kini ang gibutyag ni PDEA Regional Director Gil Cesario Castro.
Nasayran nga mukabat sa 500 mil nga kantidad sa mga punuan sa marijuana ang una nang gipang-ibot sa PDEA sa area sa Arakan, North Cotabato ug gisundan kini sa kantidad 1 ka milyon ka pesos nga marijuana ang nadiskobrehan sa hilit nga barangay sa Palimbang, Sultan Kudarat.
Tungod niini dako ang pagpasalamat ni Castro tungod sa tabang sa katawhan nga miresulta sa malampusong operasyon sa ilang tropa. Usa sa mga gituohan nilang hinungdan nganong nahimo sa pipila ka mga tawo ang pagtanum ug marijuana gumikan gihapon sa kapobrehon.
Sukwahi sa ubang lugar sama sa Coldellera nga ang pagtanum ug marijuana nahimo nang usa ka tradisyon ug kultura aron duna silay ikabayad sa ilang utang. Dinhi sa rehiyon 12, kapobrehon ang nagtukmod ngadto sa pipila ka mga tawo sa pagpanum niini aron duna silay magamit sa pag-adlaw adlaw nilang gastosahan.
