Usa ka conductor sa Bachelor Bus gikan sa San Francisco, Agusan del Sur ang nagpositibo sa paggamit ug droga atol sa gihimung sorprisang drug test nga gihimu sa Phil. Drug Enforcement Agency (PDEA) dinhi sa rehiyon sa Caraga subay sa ilang gipatuman nga “Oplan Huli Week” kagahapon.
Dungan nga gilusad ang Oplan Huli Week sa mga dagkung terminals dinhi sa rehiyon sama sa Langihan Premium Bus Terminal ug Robinson Terminal sa Butuan City, San Francisco Terminal, Tandag City Terminal ug Surigao city Terminal.
Wala gipanganlan sa PDEA ang nasangpit nga conductor nga nagpositibo sa droga ug gisalig na sa kadumalahan sa Bus company ang sunod nga lakang niini.
Gipasabot ni PDEA Caraga Reg’l Director Aileen Lovitos nga usa ka nationwide nga kampanya sa ahensya ang Oplan Huli Week niining obserbasyon sa Lenten season aron masiguru ang kaluwasan sa mga pasahero diha sa kamot sa mga bus drivers.
Nakita usab sa datus sa PDEA sa tibook nasud ang pagtaas sa porysento sa mga nagpositibong bus driver sa paggamit ug droga.
Sa talaan sa PDEA Caraga mokabat sa 59 ka mga drivers, 55 ka conductor ug 7 ka inspectors ang napailalum sa drug test gikan sa terminal sa Butuan city; didto sa San Francisco, Agusan del Sur adunay 14 ka mga drivers, 14 ka conductors, 7 ka inspectors, 1 ka canvasser ug 4 ka dispatcher; sa Surigao city adunay 79 ka mga drivers, 11 ka conductor ug 8 ka mga canvassers ug didto sa Tandag city, Surigao del Sur adunay 12 ka mga drivers, 12 ka mga conductors, 3 ka dispatchers, 1 ka inspector ug duha ka mga empleyado sa bus company.
[image: huliweek.jpg]
