General Santos City–Giangkon ni Rebeca Magante ang labaw sa City Social Welfare And Development Office (CSWD)-Gensan nga aduna gayuy sipyat sa pagkuha ug impormasyon sa mga posibleng binipesyaryo sa Social Amelioration Program (SAP) sa DSWD.
Kini tungod sa dishonesty o dili pagsulti ug tinuod sa mga indibidwal sa ilang impormasyon ug status sa kinabuhi.
Posible matud pa nga sa paghatag nila ug impormasyon wala nila gideklara ang tinuod nga trabaho sa bana o asawa hinungdan nga nakalusot sila sa validation sa DSWD.
Gipaklaro ni Magante nga nakalatid sa Social Amelioration Card nga ginapermahan sa mga makadawat niini ang bahad nga mamahimo silang mapasakaan ug kaso ugaling namakak sila sa ilahang impormasyon.
Usa sa mando ni Magante sa ilang mgapersonnel nga anaa sa field nga tanang balay ang kuhaan ug imposmasyon apan dili matud pa pasabot nga ang tanang nakuhaan ug impormasyon ang makadawat ug pinansyal nga ayuda.
Gibutyag usab ni Magante nga nakalatid usab sa Memorandum Circular Number 9 sa DSWD nga dili tanang single mother, PWD ug senior citizen ang diha diha nga makadawat sa SAP sa goberno.
Samtang, gipasalamatan ug dako ni Magante ang mga tawo nga nakadawat ug ayuda ilawom sa SAP nga nahimong matinud-anon ug gibalik ngadto kanila ang mga form uban ang kwarta tungod kay aduna silay pension o trabaho.(Dave Silagan)
