General Santos City–Giklaro ni Police Col. Aden Lagradante, City Director sa Gensan City Police Office nga managlahi ang ginahimong intel operation sa hisgutanang illegal nga droga ug suspek sa mga pagpamusil sa dakbayan.
Pamahayag niya nga ilahang ginahimuan ug pamaagi aron nga matutukan ang tanang krimen sa dakbayan hilabina ang kaso sa pagpamusil apan dili matud pa sayon gumikan aduna may managlahing motibo sa maong krimen.
Apan higayon nga adunay mga biktima ang naunang nagpakitabang kanila ayha pa man ang krimen, mas dali ang ginahimong imbestigasyon gumikan aduna nay lead ang kapulisan.
Samtang gibutyag ni Col. Lagradante nga ang intelligence nga ginahimo sa illegal nga droga mas sayon gumikan aduna na silay daang impormasypon gikan mismo sa kumunidad.
Ug kini ang ginakumpirma nalang pinaagi sa surveillance ingon man test buy hangtud nga himuon ang operasyon ngadto sa mga target.
Apan ang kaso sa riding in tandem, taas matud pa kining hisgutanan ug daghan ang gikinahanglang i-konsidera, rason nga sa karon ilaha ng mas gipakusgan ang pagbantay sa checkpoint aron lang mabatukan ang mga posibleng mahitabong patay.
Kalabot niini, gibutyag ni Col. Lagradante nga ang mga kaso sa pagpamusil sa bulan sa Hunyo ang nahatagan na ug pagtagad kung asa uban niini ang nasulbad ug aduna nay mga napasakaan ug kaso.
Samtang ang uban ang padayon pang gina-imbestigahan ug iyahang gipaniguro nga mahatagan ug hustisya ang mga biktima.
Lakip sa ilahang ginapakusgan mao ang kampanya batok illegal nga droga ug hangtud nga aduna pa silay impormasyon nga madawat bahin sa mga nahilambigit niini, magpadayon ang ilahang mga operasyon.(LVR)
