General Santos City–Gihingusgan karon si Police Sr. Inspector Davis Dulawan ang hepe sa Police Station 4 nga lihitimo ang ilang gihimong operasyon sa Sitio Klaha, Barangay Conel ning syudad niadtong milabay nga adlaw batok sa usa ka Zaldy Baculi nga namatay sa operasyon human nga nakigpinusilay sa mga pulis.
Sumala pa ni PSI dulawan nga ayha sila misaka ngadto sa panimalay sa suspect miagi pa sila sa Barangay Conel ug nag pa-uban sa usa ka barangay kagawad ug barangay tanod aron nga aristuhon ang suspect nga maoy responsible sa pagpusil ug tigbas patay sa usa ka Ronald Tanghian apan miuna matud pa kini ug pabuto ngadto sa mga pulis.
Gikumperma usab ni Dulawan nga m adto sa Police Station 4 ang nag paila nga igsuon sa namatay nga suspect aron nga ipaklaro ang tanan tungod kay daghan matud pa sila ug nadungog gikan sa mga tawo nga wala misukol ang ilang igsuon inay gipatay ra sa kapulisan.
Samtang pormal naman usab nga napasakaan ug kasong murder ang nabiling suspect nga si Rommel Callao sa prosecutors office ug nagpaabot nalang sa commitment order gikan sa korte aron nga mabalhin kini sa Lanton Reformatory Center. (Dave Silagan)
