General santos City— Gipaklaro ni Police Chief Superintendent Marcelo Morales, Regional Director sa Police Regional Office 12 nga wala silay mga namonitor sa karon nga mga posibleng miyembro sa MAUTE-ISIS nga nahibilin sa rehiyon human ang natigayong operasyon sa miyembrong si Najib Pundog.
Pamahayag niini nga nagpabilin ang hugot nga siguridad sa rehiyon 12 hilabina human ang natigayong pagpamomba sa Basilan. Dili matud pa nila tugutan nga adunay mamahimong bag-ong miyembro sa maute-isis sulod sa rehiyon 12.
Dugang pamahayag ni PCSupt Morales nga sa karon wala silay nadawat nga unsa mang impormasyon nga adunay posiblreng mga bomba nga ipangtanom sa managlahing parte sa Mindanao.
Busa awhag niini ngadto sa katawhan nga dili gilayong mag-tuo sa mga impormasyon nga nagakatag hilabina sa mga text o sa social media. Gumikan posibleng tumong lang sa mga nagapakatag sa maong impormasyon mao ang maghatag ug panic sa katawhan.
Gi-awhag man usab ni Chif Supt. Morales ang katawhan nga higayon makadawat ug samang mga impormasyon, mas maayong kini ang ipaabot sa otoridad. Kini aron ma-validate ang samang mga impormasyon inay nga ipakatag usab nga posibleng makahatag ug ka-alarma sa publiko.
Panawagan niini sa katawhan nga tabangan ang kapulisan ug kasundaluhan nga ipabilin ang kahapsay ug kalinaw pinaagi sa paghatag ug saktong impormasyon ug dili ang magpakatag ug sayop nga mga detalye. (Lore Romualdo)
