General Santos City–Gihatagan na ug direktiba ni Police Col. Noel Kinazo, Provincial Director sa Sultan Kudarat Provincial Police Office ang Chief Of Police sa Columbio Municipal Police Station nga paspasan ang imbestigasyon sa pagsunog sa duha ka heavy equipment sa Brgy. Sinapulan, Columbio nga iyaha sa Gemma Construction.
Pamahayag ni Col. Kinazo nga higayon ma-kompleto na ang report bahin sa maong insidente, mupasang-at na sila ug kaso batok sa mga suspek nga unang nagpa-ilang sakop sa rebeldeng New People’s Army kon NPA.
Nasayran nga gibana-banaang mubalor sa 15 milyones ka pesos ang nahimong damyos sa maong insidente human nga gisindihan sa mga armado.
Dugang pamahayag ni Col. Kinazo nga adunay duha ka grupo sa mga NPA ang nagalihukan sa area of responsibility sa Sultan Kudarat.
Apan subay sa ilahang intelligence monitoring ang mga NPA nga nagalihukan sa kabuhkiran nga bahin sa Kasalamansig, Lebak ug Sen. Ninoy Aquino ang huyang na ug wala nay igong pwersa.
Samtang ang mga NPA nga sakop sa Guerilla Front 72 ang ilahang gikonsiderang hagit dili lang sa kapulisan kundili bisan na sa militar gumikan aduna pay daghang ihap sa miyembro niini.(LVR)
