Labor: Full foreign ownership gisupak

23

Davao City – Supak ang Trade Union Congress of the Philippines (TUCP) sa gipanday karon nga foreign investment ownership sa mga pamatigayon sa nasud nga giduso karon diha sa hawanan sa Kongreso.

Matud ni TUCP Spokesperson Allan Tanjusay, dili makatugot ang ilang grupo nga mahatagan og kahigayonan ang mga langyaw nga makapanag-iya na sila sa mga negosyo ciento por ciento.


Ubos sa presenteng balaod, 40% lamang sa kinatibuk-ang shares ang puwede angkunon sa langyaw samtang 60% gitagana lamang alang sa mga Pilipinong negosyante.

Sumala ni Tanjusay, ang foreign investment ownership magresulta sa pagsaka sa presyo sa basic services ug basic commodities.

Kung tugtan gayod ang 100% foreign ownership, basin ang mahitabo maadto lamang sa kamot sa mga langyaw’ng magpapatigayon ang kritikal nga sector sama sa basic services ug uban pa butang nga gikabalak-an og maayo ni Tanjusay.

Subay sa balaud, may gahum na unya ang mga langyaw nga makakontrolar sa basic services nga matang sa mga negosyo ug gawasnon usab silang mag-withdraw sa ilang capital kung buot silang muhawa sa nasud.

Giingon ni Tanjusay nga mas lugi ug disbentaha alang sa nasud ug sa bahin sa mga Pilipino ang 100% foreign investment ownership kay basin sa pag-abot sa panahon, manghawa ang mga langyaw dinhi sa Pilipinas.

Ang mas delikado pa gayod sa foreign investment mao nga mabutang sa hulga ang nasudnong seguridad kung makasulod ug mahawiran sa mga langyaw ang dagkung mga pamatigayon dinhi sa Pilipinas, dugang ni Tanjusay.

RadyoMaN Joel Viray

Facebook Comments