Dili mo-undang ang sector sa mamumuo sa ilang lihuk protesta atubangan sa Department of Labor and Employment (DOLE) Caraga hangtud dili matubag ang nag-unang mulo ug reklamo sa ilang batakang katungod nga yano ra’ng gilapas sa mga kapitalista.
Subay sa obserbasyon sa Labor day karong Mayo 1, gikasa sa Kilusang Mayo Uno (KMU) Caraga ang lihuk protesta atubangan sa DOLE kauban ang nagkahiusang mga mamumuo ilabina ang gikan sa sector sa industriya sa mina ning rehiyon.
Sigun ni Jojo Podador, ang spokesman sa KMU-Caraga nga matag buwan nalang nagbalik-balik sa buhatan sa DOLE ang mga mamumuo nga gilupigan gikan sa CTP Construction and Mining Corporation, Marcventures *Mining* and Development Corporation (MMDC) ug Libjo Mining Corporation apan gipasa-pasa lang sila ngadto sa National Labor Relations Commission (NLRC) ug gibalik na pod sa DOLE diin hangtud karon wala pay konkretong solosyon sa ilang mga reklamo.
Gitangtang ang maong mga mamumo pinasikad sa retrenchment apan wala gisunod matud pa sa maong mga kompanya ang palisiya nga “first in first out” nga sistema.
Gisinggit usab sa KMU ang isyu sa suhulan, panarbaho ug ang pagbasura sa TRAIN Law nga maoy gibasul sa taas nga presyo sa mga palaliton nga nakaapekto ug daku sa gamay nga kita sa mga yanong. [image: KMU.jpg]
