Davao City – Nauyonan karon sa Associated Labor Union – Trade Union Congress of the Philippines (ALU-TUCP) ang kinatibuk-ang unod sa ika lima nga hugna sa ‘State of the Nation Address’ (SONA) ni Pres. Rodrigo Duterte.
Matud ni TUCP Spokesperson Allan Tanjusay, ang pagpalanog ni Duterte sa iyang mga planong buot buhaton sa pagpukan sa COVID-19 crisis ug pagpabangon sa ekonomiya sa nasud gikalipay sa sektor sa pamuo.
Gidayeg ni Tanjusay ang pagpasalamat ug pag-ila ni Duterte sa mga frontliners tungod sa dili hitupngan nga kontribusyon sa kampanya kontra ning maong pandemic.
Matud ni Tanjusay, sibo ang giluwatang pamahayag sa presidente sa makita nga mga kalampusan sa programa ug proyekto sa nasud karon.
Apan ang adunay pinaka dakung impact sa TUCP mao ang paghatag og bili sa pamuno-nasud sa kinabuhi versus sa negosyo ug ang pagtabang ngadto sa mga negosyante pinaagi sa pagpa-utang kanila nga walay tubo.
Sakto lang ang pagahimoon sa gobyerno nga pautangon ang mga negosyante kay pinaagi niini, makabalik og trabaho ang minilyon ka mga Pilipino kansang panginabuhian nahunong tungod sa epekto sa pandemic.
Daku ang kumpiyansa sa tigbamaba sa maong organisasyon nga mahimo ra sa Duterte administration ang iyang mga saad sa mga nabiling bulan kaong tuiga antes pa man siya hingpit mukanaog sa gahum sa tuig 2022.
RadyoMaN Joel Viray
