South Cotabato–Patay ang usa ka laborer human gidunggab sa usa ka negosyante alas 12:10 kagahapong adlawa sa Purok Aquino, Barangay Lamsugod, Surallah, South Cotabato.
Giila ang biktima nga si Jim Abin Caubat, 41anyos, residente sa Purok Avance sa maong Barangay. Samtang giila ang suspek nga si Norie Borla Depositario, 54 anyos, negosyante, ug residente sa Purok Quezon, Barangay Lamsugod.
Subay sa imbistigasyon nasuta nga ayha pa nahitabo ang pagpanunggab nag-estorya pa ang biktima ug ang suspek sa may Purok Plaza sa maong lugar. Pila ka gutlo ang nakalabay, naglalis matud pa ang mga nasangpit nga miresulta sa pagpanunggab.
Gilayong gidala sa ospital ang biktima apan nakabsan gyud kini sa iyang kinabuhi. Samtang suspek paspas nga misibat human sa insidenti. Sa karon padayon ang gihimong imbistigasyon sa kapulisan kalabutan sa insidenti.
