Laborer nga nadakpan sa pagpayuhot sa illegal nga droga sa siyudad sa Malaybalay, wanted pa sa kasong Carnapping

Gibalhog na sa prisuhan sa siyudad sa Malaybalay ang usa ka laborer nga ang kinsa nadakpan sa pagpayuhot sa illegal nga droga ug wanted pa sa kasong Carnapping.

Sa gipahigayong drug buy-bust operation sa mga kapulisan pasado alas 4:03 sa hapon kagahapon didto sa Purok-2, Barangay San Jose, Malaybalay City, nasikop si Noel Rama, 23 anyos, laborer, ug residente sa Purok-1, South Poblacion, Maramag, Bukidnon.

Nakompiska gikan sa suspek ang muabot sa pito ka pakete sa gituohang drogang shabu, duha ka mga bala sa 12-gauge nga shotgun, laing duha ka mga bala sa 9mm nga pistola, improvise nga pouch, tape, ug kwarta nga mubalor sa P670.00.

Pagdala sa suspek sa prisuhan, nasayran nga adunay pay nakatanggong nga warrant of arrest ang suspek sa kasong Carnapping.

Nakakustodiya na karon sa Malaybalay City Police Station ang suspek nga mag-atubang sa patong-patong nga kaso sa paglapas sa RA 9165 kon Comprehensive Dangerous Drugs Act of 2002, RA 10591 kon Comprehensive Firearms and Ammunition Regulation Act, ug RA 10883 kon ang New Anti-Carnapping Act of 2016.