Davao City – Matag adlaw gabiyahe gikan Toril area paingon sa downtown si Jade Dante ug pirme siya madisturbo sa mga makililimos sa mao nga dapit busa muhatag na lamang kini.
Mapugos og hatag sa mga makalilimos si Vanessa Grace Gasapin dili tungod kay naluoy kini apan wala na usay laing option gawas sa paghulog og sinsilyo sa baso nga ilang itumod sa mga tawo.
Kung nasayod pa lang unta daw si Vanessa nga dunay balaod nga Anti-Mendicancy Law, sigurado dili gayod siya muhatag sa mga makililimos apan wala man siya mahibawo mao nga tunol na lang pod siya.
Wala mahimuot si Pastor Care Daggon nga makita ang uban nga wala naningkamot sa kaugalingon inay nagsalig lang sa ubang naghago og trabaho pinaagi sa pagpangayo og limos.
Busa panahon nga makakita si Pastor Care og makililimos, dili gayod kini bati-on og kaluoy sanglit alang kaniya sama ra nga iyang gidasig sila nga magtinapulan ug magdepende diha sa pagpanglimos.
Si Gheena Agtas kinsa graduating sa Master of Arts in Counseling sa Koinonia Theological Seminary Foundation Incorporated nagsulti nga pipila sa rason nganong nagpalimos ang tawo kana tungod walay nahuman, kuwang ang pagsalig ug ubos ang tan-aw sa kaugalingon ug dugang ang pagka-kabos.
Niining panahon sa pasko, tambag ni Gheena nga mas maayo dili kwarta ang itunol inay pagkaon ug mga gamit aron dili manganad ang mga nagapangpalimos.
Sa mao nga paagi matudloan ang mga makililimos nga mubarog sa kaugalingong mga tiil sa pagkugi uban sa tabang sa mga programa sa gobyerno aron dili sila magpalimos sa mga tawo.
Mga kasama, atong hinumduman nga gikumpletohan kita og parte sa lawas dihang giporma sa Dios ang tawo sa tumong nga mahimong responsable ug maningkamot kita aron mabuhi.
Kung naningkamot ang may mga dipisrinsiya sa lawas aron mabuhi nan walay rason sab nga dili kita magkugi ug magpatulo sa atong mga singot sanglit ang pagpalimos panginabuhi kini sa mga tapulan.
RadyoMaN Joel Viray
