Davao City – Supak ang Sangguniang Kabataan (SK) Chairman sa Barangay Lapu-Lapu Agdao ning syudad nga papas-anon og responsiblidad ang mga anak ngadto sa edaran na nilang mga ginikanan.
Matud ni SK Chairman Paul Dominic Rodriguez, dili maayo paalsahon sa bug-at nga obligasyon ang mga anak ngadto sa ilang mga ginikanan nga edaran ug dili na makasuporta sa ilang kaugalingon.
Mao kini ang reaksiyon sa SK Chairman labot sa gipanday nga sugyot-balaudnon sa Kongreso nga magsilot sa mga anak nga magmagahi sa pagsuporta sa ilang mga ginikanan nga edaran na.
Segun ni Rodriguez, dili investment ang mga anak aron inig katigulang sa mga ginikanan, palukduhon sa panginahanglanon sa ilang mga ginikanan subay sa gimugna karon nga balaud.
Giingon ni Rodriguez nga dili dapat but-an ang mga anak sa angay nilang buhaton inay hatagan sila og dakung espasyo sa pagpili kung suportahan ba nila o dili ang ilang mga ginikanan inig katigulang na.
Gisaway pa sa SK official ang sugyot-balaudnon kay magpahuyang ug magpabungkag kini sa kultura sa mga Pilipino diha sa paghikutar sa kaugalingong pamilya ug sa kaliwatan.
Gihingusgan ni Rodriguez ang pagtukod og mga puy-anan nga kabutangan sa mga edarang ginikanan nga gi-abandono na ilang sa mga anak inay nga paantuson ug obligahon ang mga anak sa pag-atiman sa mga katigulangan.
RadyoMaN Joel Viray
