Davao City – Gipanaad ni PRO XI Regional Director PBGen Marcelo Morales nga mataktak sa serbisyo ang usa ka pulis ug atubangon ang kasong kriminal ingun man ipailawom sa imbestigasyon ang opisyal sa DCPO nga ang manghod managsamang nadakpan sa buy bust operation nga gipangunahan sa Talomo PNP.
Sa media presentation sa DCPO, nasagmuyo pag ayo si Gen Morales sa kalambigitan ni Police Staff Sergeant Elcelito Marandan Colita, miembro sa Marilog PNP sa illegal drug operation.
Gi relieve na usab isip hepe sa DCPO Personel Dept. si Police Major Peter Jhon Muring ang igsuon sa suspek nga si Glen Art Muring nga kaubang naaresto ni Sgt. Coleta didto sa Bo. Obrero kagabie.
Gipailalom na sa floating status ubos sa DCPO personel holding office si Major Muring aron mainbestigahan sa iyang tulubagon isip tinugyanan sa balaod diha sa illegal nga kalihukan sa iyang igsuon.
Gimandoan usab ni Morales si DCPO Chief Col Alexander Tagum nga i-relieve ang hepe sa Marilog PNP lakip nga in-charge sa personnel sa maong presento sa rason nga wala niini mamonitor ang lihuk sa ilang sakop nga si Sgt. Coleta.
Nagpahimangno usab kini sa tanang station commander sa rehiyon onse nga hugot bantayan ang ilang mga elemento aron daling matiktikan kun aduna kini sindikato nga binuhatan.
RadyoMaN Erin Lumosbog
