Mapasalamaton ang sa katawhan sa tulo ka mga hilit nga Barangay sakop sa lungsod sa Sergio Osmeña sa gipahigayon nga Medical/ Dental Outreach didto sa Covered Court sa Barangay Nebo sa maong lungsod, sa mianging mga adlaw.
Kini usa ka pinaskuhan alang sa pagbukas sa bag-ong tuig ngadto sa mga katawhan gikan sa tulo ka mga Barangay langkob sa Barangay Nebo , Prinsesa Freshia ug Marapong ang nabulahan sa libreng serbisyong medical gikan sa kagamhanang probinsyal ilawom sa pagdumala ni Governor Roberto Y. Uy.
Mikabat sa 250 ka mga residente gikan sa tulo ka mga barangay ang nakadawat og mga kinilong bugas, noodles ug sardinas.
Samtang adunay kapin kung kulang 500 ka mga lumulupyo ang nagpakonsulta og libreng natagaan og tambal lakip usab mga bitamina.
45 ka mga batang lalake ang libreng natuli ug 60 usab ang libreng naibtan og ngipon.
Naapod-aporan usab sila og mga liso sa nagkalain-laing utanon gikan sa Office of the Provincial Agriculturist.
Mipahigayon usab og Supplemental Feeding ang Provincial Social Welfare and Development Office ngadto sa mga kabataan. (PSWDO).
Kini tanan nahimong malampuson gumikan usab sa panaghiusa ug panagtinabangay sa mga lideres sa probinsya aron maalagaran ang mga katawhan sa Zamboanga del Norte sa mga serbisyo nga ilang kinahanglan. (PIC-ZSM)
