Nag-positibo sa COVID-19 ang tulo (3) ka mga taga-Taguig City nga namuyo sa Brgy. Kiburiao kaniadto, ug mo-uli na unta sa Quezon, Bukidnon. Naka-isolate sila karon sa Northern Mindanao Wellness and Reintegration Center (NMWRC) sa Malaybalay City.
Nisakay ang maong mga pasyente uban ang duha (2) ka kapamilya nila sa Cebu Pacific Flight 5J389 kaniadtong Hunyo 29, 2020, ug miabot kini sa Laguindingan Airport pagka 4:24 PM. Gikuha kini sa sakyanan sa munisipyo sa Quezon aron ihatod sa Malaybalay. Pagka 9:00 PM, niabot sila sa NMWRC, kung diin gi-checkup sila.
Nagpositibo sila sa Rapid Antibody Test, hinungdan nga wala gipadayon pagbiyahe ang tibuok pamilya. Gipasulod usab sila sa RT-PCR test for COVID-19 sunod adlaw.
Kagahapon, Hulyo 2, 2020, nigawas ang resulta nga positibo sa COVID-19 ang maong mga pasyente. Samtang gihulatan pa ang resulta sa RT-PCR test sa duha (2) ka kapamilya nila, naka-quarantine silang lima (5) sa NMWRC. Wala nakasinati og sintomas ang tibuok pamilya.
Sukad sa ilang pag-abot sa Malaybalay, wala na gipabiyahe ang lima (5) nga magpamiliya.
Naka-quarantine usab sa Barangay Isolation Units ang 11 ka tawo nga ilang nakahimamat sa biyahe. Hugot kini nga gi-bantayan sa mga Barangay Health Emergency Response Teams (BHERTs), inubanan sa Municipal Health Office (MHO).
Samtang sa lungsod sa San Fernando, Bukidnon.
Sa opisyal nga pamahayag sa mao nga LGU kagahapon gikasubo nga gipahibalo ni Mayor Levi Edma nga adunay nay nagpositbio sa COVID-19 sa San Fernando.
Ang unang kaso, usa ka returning overseas Filipino gikan sa Sauid Arabia, babaye, 33 anyos nga lumulupyo sa Baragay Matupe, sa mao nga lungsod.
Ang mao nga ROF nakauli sa nasud niadtong Hunyo 18 ning tuiga ug nakasaky sa sweeper flight padulong sa Laguindingan Airport niadtong Hunyo 24, 2020. Niagi kini sa Rapid Diagnostic Test sa NMWRC ug nag-negatibo ang resulta maong deresto kining gihatod sa Barangay Isolation Unit diin gipatuman ang istriktong quarantine.
Niadtong Hunyo 29, gidala kini siya sa Bukidnon Provincial Medical Center para sa RT-PCR test tungod adunay siyay sintomas sama sa talagsa nga pag-ubo apan wala kini hilanat. Niadtong Hulyo 1, 2020, gi-release sa DOH ang resulta sa swab test ug nagpositibo sa COVID-19.
Sa karon, ang mao nga ROG nahimutang sa Barangay Isolation Unit sa mao nga barangay ug gipatuman ang istriktong quarantine protocol. Gihimo na usab ang contact tracing sa mga nahimong close contact niini.
Samtang ang ikaduhang kumpirmadong kaso sa COVID-19 sa mao nga lungsod usa ka 33 anyos nga LSI nga taga Little Baguio, San Fernando. Nagpositibo kini sa RT-PCR Confirmatory test nga gipagawas sa DOH kagahapong adlawa.
Ang mao nga LSI gikan sa Lapulapu City, Cebu ug niadtong sa Laguindingan Airport niadtong Hunyo 29. Gipailawom kini sa rapid test pag-abot niya sa Municipal Ligtas COVID-19 isolation unit ug nagpositibo maong gipabilin sa mao nga pasilidad.
Ang mao nga LSI mao ang ikaduhang kumpirmadong kaso sa COVID-19 sa San Fernando, Bukidnon ug gipailawom na sa istriktong isolation.
Nagpabilin usab kining asympotomatic ug gihimo na ang contact tracing sa mga naka-close contact niini.
