Davao City – Gikalipay sa netizens labi na kadtong mga nabiktima sa investment scheme nga Rigen Marketing ang pagkasikop sa usa sa nagdumala niini nga si Kharl Dexter Auditor.
Nasayrang naka-kustodiya na karon si Auditor sa National Bureau of Investigation (NBI)-XI nga nag-atubang sa kasong Estafa, ug Syndicated Estafa human nahimong usa sa utok sa maong scam kinsa nadakpan niadto pang Enero ning tuiga didto sa Laguna apan wala pa na-transfer gumikan usab sa travel restrictions nunot sa COVID-19 pandemic.
Sa komento sa netizen nga si Abelardz Roa sa DXDC 621 RMN Davao Facebook page, gisaysay niini nga sakto ra nga manubag kadtong mga nagpasiugda sa maong investment scheme nga miilad sa daghanang biktima.
Aduna usay mga netizens nga mibutyag sa kantidad sa ilang gi-invest nga kwarta nga gusto pa nilang mauli diin ang uban miingon nga ilaha pa kining giutang ug uban ilang hinaguan.
Kahinumduman nga niadtong Enero 21, 2021 sa dihang gihukmang guilty ang igsoon ni Kharl nga si King Paul Bryan Auditor, ang gikonsiderang founder sa maong investment scheme.
Gikatakdang dad-un sa NBI Tagum ang dinakpan.
RadyoMaN Kirby Manzon
