Davao City – Anaa sa pito (7) ka indibidwal ang naangol sa nahitabong disgrasya tali sa forward truck ug Public Utility Jeepney (PUJ) sa Sitio Titugop, Barangay Suawan, Marilog District, Davao City along Davao-Bukidnon National Highway alas-4:40 kagahapon sa hapon (Abril 21, 2021).
Sa interbyu sa DXDC RMN Davao kang Police Captain Philip Dave Uddin, Office in Charge (OIC) sa Marilog Police Station, giila niini ang driver sa truck nga si Delmil Medello, 38-anyos, residente sa Purok 4, Brgy. Kipadocan, Pangantokan, Bukidnon. Samtang ang driver sa PUJ mao si Panfilo Saludez, residente sa Upper Tamugan, Marilog District ning syudad.
Gisaysay ni Uddin nga nawad-an og brake ang truck rason sa pagbangga niini sa gisundan nga jeep resulta sa pagka-injured sa sakay sa PUJ o sa unom ka pasahero lakip na ang driver niini nga daling gidala sa balay tambalanan.
“Ang kadtong forward truck nga naay crane, actually nagsunod ‘ni siya sa jeep nga kadtong nabangga. Pag abot didto nga area nawad-an og brake ang kining truck mao ‘tong nabanggan niya kay nikusog ang iyahang dagan, nibulusok siya, nabanggan niya ang jeep. Mao ‘to nga natuklod ang jeep then nabangga pud ‘to niya ang dako nga pipe nga naa diha sa kilid sa highway,” sulti ni Uddin.
Kasong Reckless Imprudence resulting to Multiple Serious Physical Injuries and damages to property ang atubangon sa truck driver diin kini ni-surrender sa Calinan PNP human sa insidente.
Pahimangno sa Marilog PNP sa mga motorista nga sigurohon ang luwas nga speed, distansya ug magbaton og saktong gears panahon sa biyahe.
“Nanghinaut ko sa mga driver, mga motorista nga naga-agi diri sa atoang Davao-Bukidnon Road highway nga i-maintain lang nato ang atong desiplina sa atong kaugalingon,” mensahe ni PCpt. Uddin.
RadyoMaN Kirby Manzon
