Tumang kalipay ang gibati sa laing batch napud sa mga kanhing rebelde sa probinsya sa Sarangani human ang napulo (10) kabuok kanila ang nakadawat og ayudang pinansyal isip livelihood assistance ug firearm remuneration niagi lang adlaw nga Byernes, Septembre 27, atol sa regular meeting sa PPOC kon Provincial Peace and Order Council.
Si Governor Steve Chiongbian Solon isip PPOC council chairman ang nanguna sa pagtunol sa mga tseke nga mu-total tanan og sobra Tunga sa Milyon ka pesos (P520,000), kauban sila Vice Governor Elmer De Peralta, DILG Provincial Director Samuel Camaganacan, 73rd IB Philippine Army Commander Lt. Col. Ronaldo Valdez ug Sarangani PNP Deputy Provincial Director for Operation Police Colonel Joffel Remudaro. Anaa pud sa maong panagtigum sila Malapatan Mayor Salway Sumbo, Maitum Vice Mayor Tito Balazon ug Malungon Vice Mayor Jun Escalada.
Isip bugti sa ilang gi-surender nga mga armas, usa (1) kanila ang nakadawat og Baynte-singko Mil ka pesos (P25K) ug unom (6) ang nakaangkon og tseke nikantidad og Singkwenta Mil ka pesos (P50K) matag usa. Samtang, tulo (3) ang nakadawat kada usa og tag-Saysentay-singko Mil ka pesos (P65K) isip livelihood assistance. Kini pagmatuod nga sinsiro ang lokal ug nasyonal nga gobyerno sa padayon nga pagtabang sa mga buot nang magbag-o sa ilang kinabuhi.
Segun ni Governor Solon, gi-respeto niya ang katungod sa mga naglihukan apan wala na matud pay rason sa pakig-gyera kung ang hinungdan ang kalisdanan tungod kay gapaningkamot man ang gobyerno nga mahatag ang serbisyo ug panginabuhian hilabi na sa mga lagyong lugar. Bilyones ka pesos na ang napagawas nga pondo aron padayong masemento ang nag-unang mga provincial road ug ang SAAD upland rice livelihood and livestock program sa mga kabukirang barangay, katugbang sila Senador Manny ug Congressman Ruel Pacquiao, Sangguniang Panlalawigan, mga mayores ug ang administrasyon mismo ni Pangulong Rodrigo Duterte.
Bisan pa man niana, gi-promisa ni Governor Solon atubangan sa napulo ka mga former rebel nga magpadayon ang trabaho sa lokal nga panggamhanan sa Sarangani nga padayong palambuon ang kabukiran apil na ang programa sa kadagatan aron kadtong nagduha-duha pa sa pagtahan sa ilang kaugalingon ang malamdagan sa kaulahian.
Gikumpirma ni Alyas Badong nga gamay na lang kining mga naglihok sa Sarangani Province. Makasulod ang uban tungod kay nagtalay ang Sarangani ug ang probinsya sa Davao Occidental ug South Cotabato. Matud pa ni Alyas Badong, usa sya sa buhing saksi nga wala nagtumo-tumo ang gobyerno sa ilang gitanyag nga mga kaayuhan hilabi na matud pa sa pagdumala ni Governor Solon.
Una matud pa syang nakadawat og Singkwenta Mil ka pesos (P50K), ug iya kadtong nagamit sa paglukat sa ilang kalubihan ug nakapalit pa syag motor. Ning bag-uhay lang, nakadawat napud syag laing Singkwenta Mil ka pesos (P50K), ug iya matud pa kining gamiton para sa ilang balay.
Myembro na matud pa sya karon sa CAFGU ug sya ang padayong naga-awhag sa mga anaa pa sa pundok nga mubalik na sa sabakan sa gobyerno aron makatilaw usab ang ilang pamilya sa malinawon ug komportable nga kinabuhi, ug dili na magbahas-bahas sa bukid.
