Pagadian City, Zamboanga del sur——-Laing sundalo na usab nga taga dakbayan sa Pagadian lalawigan sa Zamboanga del sur ang namatay human maigo sa sniper sa nagpadayong engkwentro sa siyudad sa Marawi.
Ang sundalong namatay giilang si Corporal Ardnie Allaga, 31 anyos nga taga Barangay Bulatoc ning siyudad sa Pagadian kinsa nakaangkon og usa ka samad sa iyang ulo nga binuhatan sa Sniper sa Maute nga milapos sa iyang nawong niadtong Agosto 7, 2017 samtang pasulod ang ilang tropa sa gipangtagoan sa mga sakop sa Maute.
Sa interview sa RMN-DXPR Pagadian kang Grace Allaga, asawa sa sundalong namatay iyang gibutyag nga siyam na ka tuig nga nahimong sundalo ang iyang bana ug kanunay matud pa ang ilang kumunikasyon samtang anaa kini sa gubat apan nakurat nalang siya human mahitabo sa iyang bana ang gidangatan niini.
Unang gidala sa Lungsod sa Tambulig ang patay’ng lawas ni Allaga apan gibalhin kini sa dakbayan aron dinhi na ipahilona diin ala una kagahapon sa hapon himpit nang gilubong si Corporal Allaga, bisan paman sa nahitabo mapasalamaton gihapon ang iyang asawa ngadto sa iyang mga kaubanan tungod nakuha pa ang patay’ng lawas samtang anaa duol na sa nahimutangan sa mga nahibiling mga sakop sa Maute, nasayran nga duha ka mga sundalo nga taga Pagadian City ang namatay sa engkwentro sa siyudad sa Marawi. (Mel Coronel/dxpr News Team
