Dungag tulo (3) ka mga rebelde ang nitahan sa sabakan sa gobyerno ato lang adlaw nga Lunes sa probinsya sa Sarangani. Gi-presenta ni 1002nd Brigade Philippine Army Commander Col. Adonis Bajao ngadto ni Governor Steve Chiongbian Solon ang maong tulo (3) ka mga myembro sa New People’s Army sulod mismo sa Kapitolyo sa Sarangani, kauban sila 73rd IB Commander Lt. Col. Ronaldo Valdez og 27th IB Commander Lt. Col. Jones Brisal Otida.
Gikan ang tulo sa Guerilla Front 71 nga naglihukan sa Sarangani Province og Davao Occidental. Dakog posisyon ang mga nasangpit tungod naglihok matud pa sila isip commanding officer, squad leader, og myembro sa medic.
Nahimong tulay ang grupo sa mga pastor sa ilang pagtahan sa kasundulahan Dominggo sa gabii, og gilayon dayon silang gi-presenta pagka-ugma ngadto sa LGU Sarangani. Bitbit sa mga nahisgutan ang mga dagkong matang sa armas, sama sa usa (1) ka AK-47, usa (1) ka Armalite og usa (1) ka Carbine.
Segun ni Col. Bajao, muagi sa regular nga proseso nga imbestigayon og ebalwasyon ang tulo aron masuta ang ilang mga partisipasyon una kini masulod sa programang E-CLIP kon Enhanced Comprehensive Local Integration Program kung diin daghan ang gapaabot nga mga benipisyo sa gobyerno.
Una nang gihingusgan ni Governor Solon nga padayong ablihan ang kabukiran aron padayon kining masulod sa kalambuan pinaagi sa padayon nga pagpasemento sa mga nag-unang kadalanan, padayong paghatag panginabuhian, og paghatud sa mga lagyong lugar sa mga serbisyo sa maayong panglawas, edukasyon, imprastraktura og turismo. Kasagaran sa mga kanhing rebelde ang gikan sa mga kaigsoonang lumad, maong prayoridad gayud sa gihapon ni Governor Solon ang upland development, katugbang sila Senador Manny og Congressman Ruel Pacquiao, Vice Governor Elmer De Peralta, mga board member og mga mayores.
Good news tungod kay kagahapong adlawa, adlaw nga Hwebes, atol sa regular board meeting sa SOCSKSARGEN ADPO kon Area Development Project Board didto sa Koronadal City, unanimous gipili nga si Governor Solon gihapon ang maoy vice chairman sa SOCSKSARGEN ADPO hangtud tuig 2022. Si Governor Teng Mangudadatu sa Sultan Kudarat ang niduso nga magpabiling vice chairman si Governor Solon, og kini ang gisuportahan ni Gensan Mayor Ronnel Rivera.
Ang chairman sa maong SOCSARGEN Area Development Project Board mao mismo ang secretary sa Department of Agriculture. Gani, anaa kagahapon si Agriculture Secretary Manny Piñol, og iyang gipaklaro nga wala pa gidawat ni Pangulong Rodrigo Duterte ang iyang courtesy resignation.
Ang SOCSARGEN ADPO ang gitahasan sa nasyonal nga gobyerno nga magtutok sa kalambuan sa entiro Rehiyon Dose.
