Davao City – Gumikan sa pagkuso-kuso ni bagyong Ompong sa nasud partikularminti sa pipila ka lugar sa Luzon area, nagpahimangno karon ang Land Transportation Franchising and Regulatory Board Davao Region sa mga drivers sa mga depasaheroan nga monitoron ang lakat sa panahon ayha mubiyahe.
Suma sa LTFRB 11 nga dakong tabang alang sa luwas nga pagbiyahe ang pagmonitor sa lakat sa panahon sa ingon dili mabutang sa peligro ang mga pasahero ug mahatud nga luwas sa ilang mga destinasyon.
Tambag pa sa mao nga buhatan ngadto sa mga drivers nga kung dili kaya ang epekto sa bagyo ug delikado gayod magbiyahe mas maayo magpundo na lang una sa mga terminal ug paaboton nga mubalik sa normal ang dagan sa panahon.
Gikumpirmar sab karon sa Philippine Port Authority Port District Office Of Southern Mindanao Port Of Davao (Sasa) nga aduna na sa’y nagkanselar sa mga biyaheng pangdagat nunot sa bagyong Ompong hinuon normal ang operasyon sa mga pantalan.
Gidasig ang publiko nga makig-alayon sa mao nga buhatan aron mahatagan sila og sakto nga impormasyon labot sa sitwasyon sa kadagatan aron dili makahinayak og larga patabok sa mga isla sama sa Samal.
Pikas bahin, nagkanselar na usab sa mga flights ang AirSWIFT Airlines sugod aning adlawa hangtud sa adlaw’ng Domingo petsa 15 gumikan ni bagyong Ompong gihapon.
Gidasig ang apektadong mga pasahero nga makig-alayon sa AirSWIFT Airlines aron maproseso ang pagbalik sa ilang mga nabayad nga pasamahe sa mao nga airlines company.
RadyoMaN Joel Viray
