Gisugdan na sa Department of Public Works and Highways (DPWH) rehiyon 10 ang ‘Lakbay Alalay’ sa Undas.
Sa interview sa RMN Malaybalay ngadto kang Vina Maghinay, ang information officer sa DPWH region 10 gibutyag niini nga nagsugod ang mao nga motorist assistance center kagahapon Miyerkules, October 31 hangtod sa alas-12:00 sa udto sa Lunes, November 5.
Matud ni Maghinay nga adunay ibutang nga personahe sa maong mga motorist assistance center 24 oras aron maka-assist sa mga motorist nga magub-an o magkaproblema sa dalan panahon sa pagbiyahe sa mga travellers.
Sigun sa DPWH nga usa kini ka motorist assistance program aron masiguro ang luwas nga pagbiyahe sa publiko ilabina sa mga muduaw sa ilang namatay na nga minahal sa kinabuhi.
Adunay naka-stand by usab nga mga service vehicles sa mga strategic locations aron maghatag sa dinaliang tabang sa mga motorista ug pedestrian.
Ang mga assistance centers ibutang sa mga nag-unang kalsada ug tulay. Sa Malaybalay, natagad sa RMN News Team nga adunay gibutang niini sa Barangay Cabangahan ning siyudad.
