General Santos – Padayong nagpaalim sa iyang samad ang usa ka lalaki nga gi-ilang si Victor Briones, 46 anyos, lumulupyo sa Purok 10, Lanton, Barangay Apopong, General Santos City ngadto sa Dr. Jorge P. Royeca Hospital human nadungaban sa suspek nga giilang si Efren Ruiz, 36 anyos, lumlupyo sa Phase II, Rabanes Street, Purok 10, Lanton, Barangay Apopong, Dakbayan sa General Santos.
Sumala pa sa imbistigasyon sa kapulisan, hubog nga niadto ang biktima sa Balay sa suspek diin duna kini bitbit nga kutsilyo sa balay sa suspetsado alas 4:30 ang takna sa kahapunon.
Nasayran nga niadtong tungura ang suspek nag inum sa iyang balay uban ang iyang mga amigo. Pag-abot sa lugar gihagit ug away matud pa sa biktima ang suspetsado.
Ang away sa duha miresulta sa pagpanunggab. Tungod sa nahitabo nakaangkon ang biktima ug usa ka samad sa wala nga abaga, kung asa gidala dayon kini sa ospital.
Nasayran nga nabalhog na ang suspek sa silda sa Police Station 2, ug gikatakda na kining pasakaan ug kaso. (Pj Sabalosa)
