General Santos City—Kritikal ang kondisyon sa usa ka Jessie Quicio, 30 anyos, Factory Worker ug residenti sa Barangay Fatima, Gensan human kining gikulata, gidunggab ug gisulod sa sako ayha gibilin daplin sa dalan sa may Accord Vill., Barangay Calumpang, Gensan.
Nasayran nga alas 5:00 pasado ang takna sa kabuntagon dihang naagian sa Patrol sa Barangay calumpang ang sako nga gisudlan sa biktima. Tungod naglihok lihok kini, ilang gisuta ug ilang gikakurat nga tawo diay ang sulod niini mao nga ilang gidala sa Dr. Jorge Royeca Hospital.
May samad ang biktima sa iyang baba kansa gituohang gibunalan ug gahing butang, may samad dinunggaban usab kini sa iyang dughan ug sa iyang kilid.
Sumala sa igsuon sa biktima nga si Ruel, alas 5:00 sa hapon niadtong Martes dihang milakaw ang iyang manghod padulong matud pa sa pagtambong sa birthday sa iyang amigo.
Nakurat nalang kini dihang sila nakadawat ug impormasyon nga nadunggaban ang biktima ug anaa sa kritikal nga kondisyon.
Sa karon blangko pa ang pamilya sa biktima kung kinsay responsabli sa krimen.
