TACLOBAN CITY – Ginbuno han 28 anyos nga lalaki an iya workmate nga pareho nga nagtatrabaho ha Department of Public Works and Highways (DPWH) Regional Office 8 ha Palo, Leyte dida han huwebes, November 7.
Subay ha report han Police Regional Office 8, ginkilala an biktima nga hi Raul Diola, 49 anyos, usa nga driver han DPWH Maasin Office.
Ginkilala naman an suspek nga hi Jeremy Miñano Dagaño, 28 anyos, usa nga Laboratory aide II han DPWH R8, residente han Brgy. Osmeña, Marabut, Samar.
Nagawas ha inisyal nga imbistigasyon han mga otoridad, pareho nga naatender hin birthday party hi Diola ngan hi Dagaño upod an iba nga mga empleyado.
Han magpila na para kumuha hin pagkaon ha buffet table, tigda nala nga ginkuha ni Dagaño an kitchen knife ngan ginbuno hi Diola.
Naangkon han biktima an binun-an ha iya tiyan.
Gindara naman ha Leyte Provincial Hospital hi Diola para matambal, samtang an suspek in naaresto han mga kapulisan.
Waray pa madetermina han mga otoridad kun ano an hinungdan han insidente.
