Padayon nga ginabulong sa Western Visayas Medical Center ang isa ka lalaki nga ginlabu sang binangon sang iya man lamang pakaisa sa banwa sang San Dionisio, Iloilo kahapon sang hapon (Abril 22).
Ginkilala ang biktima nga si Joey Martinez, 45 anyos ang edad samtang ang suspek nga pakaisa sini amo si Johnny Martinez, lunsay pumuluyo sang barangay Cubay, San Dionisio, Iloilo.
Ginpahayag ni Police Staff Sgt. Kenneth Naranjo, imbestigador sang San Dionisio PNP nga natabu ang insidente alas 2:30 kahapon sang hapon samtang nagapaninlo sang ila ugsaran ang biktima sang naghaboy sang basura ang suspek kabangdanan nga nagbaisay ang mga ini.
Bangud sa mainit nga pagbaisay, nagkuha sang binangon ang suspek kag ginlabu ang iya pakaisa nga nakaagum sang pilas sa lawas kag gindala sa ospital.
Boluntaryo naman nga nagsurrender ang suspek pinaagi sa ila barangay kapitan nga si Punong Barangay Mary Ann Hechanova kga ginturn-over ini sa mga pulis.
Ginahulat pa sang Pulis ang desisyon sang pamilya sang biktima kon mapasaka sang kaso batuk sa suspek.
