Lalaki ginpusil tungod nga kumanta han diri niya kanta ha Videoke

1627

TACLOBAN CITY – Ginpusil an usa nga lalaki matapos mag sing along ha usa nga videoke bar ha Avenida-Paterno St. Tacloban City kanina han alas 2:00 han kaagahon, August 19.

Ginkilala an biktima nga hi Carlito Paglinawan, 22 anyos, residente han Brgy. 46, Juan Luna, Tacloban City.


Sumala kan P/Capt. Daniel Polo, Tacloban PNP station 2 commander, nagtagay an biktima upod an sangkay hini ha usa nga videoke bar.

Nagawas ha ira inisyal nga imbistigasyon nga ginkanta han biktima an diri niya kanta ha videoke machine kundi kanta han duha nga suspek nga nagtatagay gihap ha mao nga videoke bar.

Han tipauli na hi Carlito, ginpusil ini han duha nga suspek sakay han motorsiklo. Naigo naman an biktima ha wala niya nga sugbong.

Gindara naman dayon ini ha hospital ngan yana nagpapatambal.

Padayon nga ginbibiling han mga otoridad an mga suspek.

Pahimatngon naman ni P/Capt. Polo ha nga pirmi nag-iinom “Kun inom, inom la, ayaw pagpadara ha kapaso han ulo.”

(With reports from Rizza Calaay)

Facebook Comments

From Advertisers