Dapitan City – NILANDING sa balay tambalanan ang usa ka lalaki human gipusil niadtong niaging adlaw mga alas 7:00 sa gabii didto sa Barangay Potungan, dakbayan sa Dapitan, Zamboanga del Norte.
Gidali pagdala sa Dr. Jose Rizal Memorial Hospital ang biktima nga si Brito Ordenisa Elumbaring Jr, 30 anyos, residente sa susamang dapit diin nahitabo ang maong insidente.
Nakaangkon og samad sa likod ang biktima agi og pinusilan hinungdan nga anaa kini sa talandugon nga kahimtang.
Samtang ang gitumbok nga suspetsado sa krimen nailhan nga si Bryan Dixon alias Luntoy, hingkod ang edad nga residente sa Barangay Dampalan, Dapitan City.
Sumala pa sa report sa Dapitan City Police Station, nga samtang gamaneho ang biktima sa iyang motorsiklo subay sa dalan sa dapit, kalit kining gipusil sa nagsunod nga supetsado nakamotorsiklo human sa krimen abtik sab kini nikalagiw sa dapit.
Wala pa matino sa kapolisan kun unsa nga armas ang gigamit sa pagpamusil ug unsay hinungdan niini.
Sa pagkakaron, padayon pa nga pagpaalim sa tambalanan ang biktima samtang gawasnon pa ang maong suspetsado.
