Malungon, Sarangani Province —Patay ang usa ka Sonny Gerona, hamtong ang pang-edaron human kining gipusil sa suspek nga naila sa pangalang Tajer Apad, hamtong usab ang pangidaron nga susamang nanimuyo sa Sitio Upper Lamcanal, Brgy. Malandag,Malungon, Sarangani Province alas 11:30 sa gabie sa nasampit nga lugar.
Sumala pa ni Police Captain Edgar Vanzuela ang Deputy Station Commander sa Malungon PNP nga basi sa ilang imbestigasyon migawas nga pauli na kining suspek sakay sa motorsiklo dunay matud pay miharang kaniya sa dalan ug sa iyang pagtuo didto midagan sa sulod sa balay sa biktima.
Dugang asoy sa opisyal nga nasuko matud pa ang suspek sa biktima human nga giingnan kini nga wala siyay kasayuran sa maong panghitabo dihang gipangutana kini sa suspek.
Tungod sa kainit sa ulo sa suspek ug anaa kini sa impluwensiya sa ilimnong makahubog ug dunay dalang armas kalit niining gipusil ang biktima sa ulo ug sa lawas nga mieresulta sa kamatayon niini, samtang paspas man usab nakasibat ang suspek human gihimo ang krimen.
Narekober sa crime scene ang tulo ka basiyo sa kalibre,45 nga pistola nga maoy gigamit sa pagpusil patay sa biktima.
Pagpaklaro usab ni Police Captain Vanzuela nga posibleng kasuko lang sa suspek ang ginalantaw nilang motibo sa krimen gumikan sa pagharang kaniya sa dalan.
Sa kasamtangan padayon pa ang gihimong imbestigasyon sa kapulisan ug ang pagpangita sa suspek, samtang giandam na ang kasong murder nga atubangon sa suspetsado. (Reynald Timario)
