Lalaki gipusil-patay

General Santos City—dead on arrival sa Mindanao Medical Center ang usa ka lalaki human gipusil sa wala pa mailhing suspek alas 8:00 kaganinang buntag sa Purok Nopol, Barangay Conel, Gensan.

Ang biktima giilang si Alias Jomar, legal age, residenti sa samang lugar. gibutyag ni Alias Inday, silingan sa biktima nga nahidangat kini sa ilang panimalay kaganinang sayo sa buntag, samtang naglingkod ang nahisgutan sa lingkuranan sulod sa ilang compound, kalit lang dunay usa ka lalaki nga misulod dayon gipusil ang biktima duha ka higayon.

Tungod sa tumang kalisang, midagan pasulod sa ilang balay si Inday ug wala na sya nasayud kung unsay nahitabo sa ilang tugkaran. Dihang namingaw na ang gawas sa ilang balay, gilili niini kung anaa pa ang biktima apan wala na kini sa iyang gilingkuran, ug wala na usab ang suspetsadong mipusil sa nahisgutan.


Laing silingan ang nakakita sa biktima nga samdan na samtang nangayog tabang. Didto ilang gikarga ang nahisgutan sa sikad ug gidala sa ospital, samtang sa dalan, nakasulti pa ang biktima nga ang nipusil kaniya nagpuyo matud pa sa dako nga balay apan wala niini gibutyag kung kinsa ang suspek. Wala usab niini gibutyag kung hain ang gisulti niini nga dakong balay nga gipuy-an sa responsabli sa pagpusil kaniya.

Wala na usab nakaabot pang buhi ang biktima sa Mindanao medical center gumikan sa samad nga naangkon sa iyang dughan.

Samtang dugang pahayag ni Alias Inday nga wala niya namay-ungan ang dagway sa suspek tungod nagsul-ob kini ug bonnet.

Dili usab siya sigurado kung dunay kaubanan ang gunman dihang gihimo ang pagpamusil. Sa kasamtangan padayon pa ang gihimong imbistigasyon sa kapulisan nga sakop sa Police Station 4 kalabutan sa insidenti samtang nakig-alayon na sila sa pamilya sa biktima sa pamasin nga duna silay makuhang impormasyon bahin sa pagpamusil.

Facebook Comments