Davao City – Gipusil patay ang usa ka lalaki alas-5:13 sa kahaponon atubangan sa usa ka tindahan sa may Villa Doneza, Poblacion Dos, Bansalan, Davao del Sur.
Biktima naila sa pangalang Janilo Llup Barimbao alias Nao, 48 anyos, minyo ug controller sa Mindanao Star Bus Company nga residente sa maong dapit.
Base sa report sa Police Regional Office XI (PRO-XI), pauli na unta ang biktima sa iyang panimalay apan nihapit kini sa maong tindahan ug kalit kini gipusil sa usa ka wala pa mailhi nga suspek nga nagsakay og motorsiklo.
Matod pa ang biktima nakahiagom og pinusilan sa tiyan, wala nga dalunggan ug kamot hinungdan sa hinanaling kamatayon niini.
Human sa insidente ang suspek daling misibat padulong sa may Barangay Tubod sakay sa XRM motorsiklo nga walay plate number.
Narekober sa crime scene ang mga bala gikan sa .45 na pistola.
Ang patay’ng lawas sa biktima gihaya na sa EB Brillantes Funeral Home, Bansalan Davao del Sur samtang ang kapulisan sa Bansalan padayon pa nga naglusad og imbestigasyon sa maong insidente.
RadyoMaN Abi Bibera
