Lalaki-gitabangan ug kulata-patay, duha sa unom ka suspek sikop

93

General Santos City—patay ang sa ka lalaki human kining gitabangan ug kulata sa unom ka mga batan-on sulod sa compound sa gitrabahuan niining smoke emission testing center nga nahimutang sa Yumang St., Barangay San Isidro, Gensan.

Ang biktima nailhang si Jeffrey Cayang Reponte, 22, ulitawo, Stay in sa CEA Smoke Emission testing Center nga nahimutang sa maong lugar ug lumad nga taga Alabel, Sarangani Province.


Sa inisyal nga imbistigasyon sa San Isidro Police Station nasuta nga Alas 12:25 ang takna sa kabuntagon kagahapong adlawa Mayo 15, 2017 nag lingaw-lingaw ang biktima uban sa iyang mga kaubanan sa trabaho sa Explore bar nga nahimutang sa Lagao-Bula Road.

Adunay grupo sa mga batan-on nga nakaengkwentro sa biktima, aron makalikay sa kagubot, sila nanguli sa ilang gitrabahuan, mga kauban sa biktima ang mipahulay na tungod pulos nakainum apan ang biktima migawas gumikan dunay gipalit sa tindahan.

Wala siya masayod nga anaa na gawas sa gitrabahuan nila ang unom ka mga suspetsadong sakay sa usa ka traysikad. Didto na nila gitabangan ug kulata ang biktima hangtud nga mamatay.
Nakaangkon ug samad sa ulo agig pospos ug gahing butang ang biktima ug mga samad sa nagkandaiyang parti sa kalawasan nga hinungdan sa iyang kamatayon.

Paspas silang misibat human sa insidenti, samtang mga kaubanan sa biktima midangop gilayon sa San Isidro Police Station.




Paspas nga mirespondi sa crime scene ang kapulisan ug gilayong nagpahigayon ug hot pursuit operation batok sa mga suspek.

Duha ka mga batan-on ang nasikop sa compound sa Explore Bar nga silang si Jason Carillo, 22, residenti sa NFA, Barangay Lagao ug usa ka Alias Ramon, 17, residenti sa Kabarlo, Barangay Lagao human positibong gitudlo sa duha ka mga testigo nga apil sa nangulata sa biktima.

Sa karon padayon pang gipangita ang upat pa ka mga suspek nga responsabli usab sa pagpangulata ngadto sa biktima.

Facebook Comments