Davao City – Dead-on-arrival nga gidala sa balay-tambalanan ang usa ka Elmer Mendo alyas Kokoy, 24 anyos, residente sa may Sitio Lomboy Brgy. Binugao Toril ning siyudad sa dihang gibunalan kini og tubo sa usa ka security guard.
Sa record nga nahipos sa Toril PNP nga mga bandang ala-una sa kahaponon kagahapon nagduty ang suspek nga si Ruther Sodosta Batobalani alyas Bonbon, usa ka security guard, sa Davao Agri-Farm sa nahisgutang lugar diin sila nag-storya usab sa biktima.
Sumala sa record, wala magkasinabtanay ang duha sa ilang nahisgutan rason nga gipabuthan sa biktima ang suspek gamit ang iyang dalang improvised nga armas de fuego kun sumpak apan nakalikay kini.
Nakahigayon ang maong security guard og kuha’g puthaw nga tubo dayon bunal sa biktima tumong sa ulo sa makadaghang higayon.
Gisulayan pa sa pagdala ang biktima ngadto sa pinakaduol nga tambalanan apan gi-deklara kini nga dead-on-arrival sa attending physician niini samtang paspas usab misibat sa wala matino nga direksyon ang suspek.
Sa pagpanubay sa kapolisan sa Toril, narekober gikan sa crime scene ang usa ka tubo nga puthaw nga gibana-banaang dunay gitas-on nga kapin kun kulang 30 ka pulgada ug usa ka basiyo sa .38 nga bala nga gitoohan nga gipabuto sa biktima.
Sa kasamtangan gidala na ngadto sa Toril Coop Funeral Parlor ang patay’ng lawas sa biktima samtang ginapangita na sa mga kapolisan ang nahisgutang suspek.
RadyoMaN Paul Canono
