Iloilo City- Ginreklamo sang katapo sang Iloilo City Anti-Smoking Task force (ICAST) ang isa ka lalaki nga tag-iya sang isa ka establisyemento sa Smallville Complex matapos namahog kag nagpakilala tupad balay ni “Mayor” agud indi pagdakpon sang ICAST ang iya promo girl nga nagapanigarilyo.
Natabo ang insidente alas 9:00 kagab-i sa Smallville Complex , Diversion Road, Mandurriao , Iloilo City kon sa diin gina-implimentar sang ICAST ang Comprehensive Anti-smoking Ordinance kag nadakpan sa isa ka establisyemento ang promo girl sang ilimnon nga ginkilala kay Florence Goco, 20 anyos.
Sang gin-hatagan sang citation ticket , nagpatunga si certain Garcia , ginapatihan tag-iya sang establisyemento kag ginhambalan ang katapo sang ICAST nga tupad balay siya ni “Mayor” , namahog kag namuyayaw.
“ Tupad balay kami bala ni Mayor , bwas kitaay ta kung isulat mo ang ngalan sang establishment ko .”
Bangud sang natabo, nagpalab-ot sang reklamo ang katapo sang ICAST sa Mandurriao PNP.
Wala naman nahibaluan kon sin-o nga “Mayor” ang ginatumod ni certain Garcia.
(photo from web)
