General Santos City—Nagpadayon ang gihimong imbistigasyon sa Police Station 2, kalabutan sa kamatayon sa usa ka Raymark Casion, legal age, lumad nga taga Lanao Del Sur ug residenti sa Yu Vill, Barangay Apopong ning dakbayan kansa naligsan matud pa ug Forklift sulod sa warehouse nga iyaha sa KCC mall of Gensan nga nahimutang sa Purok Bangaga, Barangay Apopong.
Sumala ni Spo1 Jun Paderes, Disk Office sa Police Station 2, nasuta nga una nang midangop sa ilang buhatan ang pamilya sa biktima human nga dili musulti ang mga gwardya ug ang kaubanan sa biktima kung unsa gyud ang nahitabo nganong nabanggaan ug Forklift si Casion.
Dili usab itug-an sa mga gwardya unsay pangalan sa driver sa Forklift nga nakabangga patay sa nasangpit. Gibutyag usab ni Spo1 Paderes nga wala gipablotter sa mga gwardya ug mga kaubanan sa biktima ang insidenti.
Dili usab mag-cooperate ang mga gwardya sa maong warehouse sa imbistigasyon sa kapulisan gikan sa Police Station 2. Tungod niini, naglisod gyud ang kapulisan sa ilang imbistigasyon kalabutan sa maong insidenti.
Dako usab ang pagtuo ni Maria Cristina Casim, inahan sa biktima nga adunay foul play sa kamatayon sa iyang anak. Nasayran nga igo lang silang gipahibalo sa mga kauban sa iyang anak nga namatay na ang nahisgutan sa ospital human kining naligsan ug Forklift.
Apan dihang ilang gipangutana kung unsay nahitabo, nagdumili sa pagbutyag ang mga gwardya ug mga kaubanan mao nga sila nidangop na sa kapulisan. Gibutyag usab sa live-in partner sa biktima nga si Lany Antay, nga pila ka higayon nilang giadtuan ang warehouse aron nga mangutana. Apan punay silang ginabalewala sa mga nahisgutan.
