Davao city- Angol ang usa ka lalake human kini gibunalan og pala sa iyang ninang sa kasal.
Lagom sa kilid sa mata, sa bukton ug duna say kinabrasan sa dughan ang nahiagoman ni Carlos Manares 49 anyos,minyo nagpuyo sa Parola Village, Km.10, Sasa ning siyudad.
Apan si Carlos maoy gipansak sa presohan sa Sasa PNP ug dili ang iyang ninang nga si Narcisa Cortez nga maoy namunal og pala kaniya.
Suma ni Carlos nga iya lang unta gihangyo ang iyang ninang nga kung mahimo tanggalon ang atop nga midikit sa iyang balay aron dili sila mabasa panahon nga mag-uwan.
Apan nahug sa lalis ang kumpronta ug giingon ni Carlos nga kalit siya gipuspusan og pala sa iyang ninang nga si Narcisa resulta sa mga lagom sa mata ug bukton.
Giingon ni Carlos nga napungtan sa iyang kasuko ang iyang kumpare nga si Joel Ebiral dihang namadlong kini kaniya.
Gibunlot matud pa ni Carlos ang kutsilyo nga anaa sa iyang hawak ug dayon dunggab ngadto kang Joel. Maayo na lang kay sa kamot ra naigo si Joel Ebiral diin aminado si Carlos Manares nga lango kini sa binong makahubog dihang natigayon ang insidente.
Pagresponde sa kapulisan gidakop si Carlos ug gibalhog sa selda.
Hinuon malaumon si Carlos nga makagawas ra kini sa prisohan kay dili na matud pa interesado magduso og kaso ang iyang kumpare batok kaniya.
RadyoMaN Joel Viray
