iFM Laoag – Nabawbawan ti rupa ken ulo iti maysa a lalaki kalpasan a naulod-ulod ti maysa a kotse a naggapo iti Batac City, Ilocos Norte nagpatinggana iti ili ti San Nicolas, Ilocos Norte idi rabii ti Disiembre 28, 2019.
Nabigbig ti biktima a ni Mr. Cesar Rowful Mindana, agtawen ti uppat a pulo ket uppat (44 y/o), awanan asawa, laborer, tubo iti Cantilan, Surigao del Sur ngem agnanaed iti siudad ti Batac idin to nga iti suspek ket ni Mr. Roger Nartatez y Llanes, agtawen ti tallupulo ket walo (38 y/o), residente iti Labut Sur, Santa, Ilocos Sur.
Segun ti imbestigasion, ti biktima ket inbaon dagiti pagayamna a mapan gumatang iti maysa a tianggi iti Brgy. Baay iti siudad ti Batac, idin ta sumagmamano a minutos ti napalas ket kellaat nga adda nangngegda a tupak iti kalsada.
Gapu iti daytoy insigida a napanda kinita nu anat napasamak ket nakita dan nga awan ti biktiman ngem adda dara a nagmarka iti kalsada a nakadungparanna.Naammoan laengen ti suspek nga adda iti naalud-odna a maysa a lalaki idi makadanon daytoy iti ili ti San Nicolas babaen dagiti nakaibaga ken nakakita iti bangkayen iti sirok ti luganna.
Kinumpirmaran met ni Police Corporal King John Sabado, imbestigador iti daytoy a kaso iti PNP Batac, nga addan ti nagsaritaan ti pamilya iti biktima ken ti suspek mainaig iti daytoy a pasamak. Innayunna nga awan ti maipila a kaso kontra iti suspek agsipud ta basar iti tulaganda, annugoten ti suspek iti gastos tapnun maiyawid ti bangkay ti biktima iti lugarda sadiay Surigao del Sur.
Inbatad pay ti opisial a kumpirmado a nakainom ti arak iti biktima idi naalud-od ken awan met ti plano iti pamilya ti biktima a dumalan ti otopsia iti bangkay, kasta pay nga awan ti foul-play a napasamak.Nagtalinaed iti kustodiar ti pulisia iti suspek idi rabii ngem napawaywayaanen daytoy gapu iti klaro a tulaganda iti maseknan. (Joe Anne Agustin, RMN News)
