Davao City – Gideklarang dead on arrival ang usa ka lalaki human kini napusilan alas 11:30 kagabie, Nobyembre 11, nahitabo sa T. Ronda St., Purok 6, Poblacion, Hagonoy, Davao del Sur partikularmente sa Seguiza Store.
Biktima naila nga si Reynaldo Isabeda, 44-anyos, ulitawo, adunay sakit sa pangutok, ug residente sa Poblacion, Hagonoy, Davao del Sur.
Sa inisyal nga imbestigasyon nga gilusad sa kapulisan, nasayran nga kanunay nang nagatambay ang maong biktima sa maong tindahan matag gabii diin pagka alas-10:20 sa kagabhion miabot ang usa ka grupo nga gilangkuban sa tulo ka mga lalaki ug usa ka buntis nga babaye sakay sa duha ka wala pa masuta nga motorsiklo gani mibaba ang lalaki nga naka puti og suot dayon misulod sa tindahan dayon mi-order og duha ka botelya sa bino samtang hubog niadtong tungora.
Base sa statement sa sales lady, hilom nga nag inum ang maong grupo niadtong tungora diin kalit na lamang kining nakadungog og mga nagkalahing pulong ug giimbita sa mga naasoy ang maong biktima aron makig-inum.
Pipila ka minuto ang nilabay nakadungog ang witness og buto sa pusil gani wala kini dayon migawas gumikan sa kahadlok.
Sanglit nakita nga daling mi-ikyas sakay sa ilang mga motorsiklo padulong sa wala matino nga direskyon ang mga suspetsado, daling migawas ang babaye ug napalgang nakahigda na ang biktima sa salog nga nagkadugo ang ulo nga bahin duol sa botelya sa bino ug buak nga baso.
Nakahiagom og duha ka injury ang biktima diin usa sa atubangan ug usa sa likod nga bahin sa ulo ug gituohang entry ug exit points kini sa bala.
Gisulayan pa og dala sa Davao Sur Provincial Hospital ang biktima apan way swerte sanglit namatay kini.
Ang patay’ng lawas sa biktima gipahiluna na sa Padilla Funeral Parlor sa Digos City samtang padayon sa paglusad og imbestigasyon ang otoridad may kalabutan sa maong insidente.
RadyoMaN Jason Amisola
