BACOLOD CITY – Nasapwan nga patay na ang isa ka lalaki mga las 8 kagab-i (July 30, 2018) sa Balay Pag-asa sa tupad sang Bacolod Bays Center.
Nakilala ang biktima nga si Edmund Lopez, 45 anyos ang edad, kasado kag pumuluyo sang Phase 3, Brgy. Handumanan, Bacolod City.
Suno sa Police Station 1, ang biktima nasapwan nga wala na sang kabuhi kag nagahigda sa isa ka folding bed sa sulod sang Bantay Bayan Foundation – Balay Pag-asa sa tupad sag Bay Center sa Brgy. 12.
Ginpahayag nga sang nasapwan ang biktima, gintawgan pa ini sang mga katapo sang Disaster Risk Reduction Management Office kag didto nakita nga wala na ini sang pulso kag wala na naga-ginhawa.
Base sa pagpangusisa, ang biktima gali ang nag-angkon sang stroke sadtong July 27 kag gindala pa sa Corazon Locsin Montelibano Memorial Regional Hospital apang sang ulihi, ini ang ginturn-over sa Balay Pag-asa.
Wala sang may nakita nga foul play ang mga utoridad sa kamatayon sang biktima./dyHB BACOLOD
