RMN LAOAG – Natay ti maysa a lalaki kalpasan a napaltogan daytoy iti paset ti Barangay Capangdanan iti ili ti Pinili, Ilocos Norte idi laeng rabii.
Nabigbig ti biktima a ni Jayson Rondal y Pagaduan, agtawen iti 27, residente iti Barangay Napu, Badoc, Ilocos Norte.
Segun kenni Senior Inspector Jeffrey Taccad, hepe ti PNP Pinili, napasamak iti pamaltog iti oras ti alas 7:50 idi laeng rabii iti barangay Capangdanan nu sadino bayat a nakalugan iti Yamaha NMAX a motorsiklo ti biktima nga agpaamianan iti nasao a barangay bigla daytoy a pinarakpak dagiti suspect a maipagarup a naglugan met iti motorsiklo.
Rumrumwar a sumursurot ti lugan dagiti suspect iti biktima sakbay iti insidente. Dagus a timmalipuagaw dagiti suspek kalpasan iti pamaltog. Narekobre iti crime scene ti apat (4) a fired cartridge cases manipud iti caliber .45 pistol, maysa (1) a slug ken maysa (1) a deformed slug nga aggapu metlaeng iti nasao a paltog.
Intaray ti PNP ti biktima iti Karmelli Hospital, angem, indeklararda daytoy a dead on arrival. Aginggana kadagitoy, saan pay makaipaay ti motibo dagiti otoridad maipanggep ti napasamak ken agtultuloy iti imbestigasyon nga isaysayangkat ti Philippine National Police iti daytoy a krimen.
Bernard Ver, RMN News
