Nakibot ang pamilya sang lalaki nga gina-alegar gin-abduct sa Brgy. Taculing kag naaresto sa buy bust operation sa Brgy. Granada sa ciudad sang Bacolod kagab-i.
Las-11:50 kagab-i sang naaresto sa buy bust operation sang Police Station 5 sa public cemetery sang Brgy. Granada ang suspek nga si Arvin John Janayan, 31, sang Purok Kabukiran, Brgy. Taculing sa diin nakuhaan ini sang 5 sachets sang suspected shabu nga nagabug-at sang 6 grams kag nagabalor sang P50,000.
Apang sa interview sang DYHB sa utod sang suspek nga wala na nagpakilala, ginkumpirmar sini nga pasado las-8:00 kagab-i sang ginkuha sa ila balay si Janayan sang kapin tatlo ka mga lalaki sakay sang puti nga Toyota Innova nga wala sang plaka. Suno sa utod, ginlampusan pa sang armas ang iya utod antis gindala sang mga kalalakin-an.
Nakibot na lamang sila sang nahibaluan nga nadakpan sa buy bust ang iya utod. Ginpanindugan man sini nga wala nagaduso sang iligal nga druga ang iya utod, nga isa ka construction worker.
[image: image.png]
