GANDARA SAMAR – Ginpa-uranan hin bala han diri pa nakikilal-an nga mga suspek an 26 anyos nga biktima nga nakasakay ha motorized banca.
Ginkilala an biktima nga hi Jeffrey Dajab Cajuban, may asawa ngan residente ha San Francisco, Gandara Samar.
Ha inisyal nga imbistigasyon han Samar Police Provincial Office, ginbabaybay ni Cajuban an Gandara river tikadto unta ha Gandara Town proper pero han tikahirani na hiya, tulo nga armado nga suspek nga mayada dara nga high powered firearms an nagpa-uran ha iya hin bala.
Ha pagresponde han mga barangay tanod, waray na an mga suspek ngan narekober nala nira an mga basyo hin bala han pusil ha mabanwa nga dapit han salog . 22 nga emptyshells ngan usa nga dodge ammo han calibre 5.56 M16 riffle han mga tanod.
Igpapa-ilarom ha mortem examination an patay nga lawas han biktima.
Padayon an gindudumara nga imbistigasyon han mga otoridad han panhitabo. Kapot na liwat han Gandara Samar PNP an mga ebidensya nga nakuha ha crime scene.
